Wetj Wessem waal uuever ‘t ontstaon toet ‘t hede van Carnavalsvereniging “De Golfbraekers”?

December 1973: waerdj de basis gelag vuuer ‘t ontstaon van ós vereniging. Willem Verbaandert waas kastelein oppe ‘showboat’ in Wèssem. De boeat laag óngevieër ter huuegte woea noe de aanlègksteigers zeen.
Willem kwaam mèt ‘t idee vuuer ein Karnavalsklupke op te richte. En zoea gebuuerdje ‘t det mèt Vastelaovendj ’74 de ‘Prins te Water’, Jan de 1e, waerdje oetgerope. Hae haet ’t hieëlemoal allein mótte doon want eine Raod v 11, Adjudant of Prinses woeare d’r neet. Mer ‘t begin waas d’r.
In 1974 waerdje ‘t allemaol serieuzer. De ieërste Raod v Elf waerdje geformeerdj en zie kwame geliek aan landj. Zie wólle d’r  vuuer hieël Wèssem zeen. Prins Herman (Peeters) 1e  waas in 1975 de ieërste Prins op ‘t vaste landj en Peter Deneer ꝉ (Pieërke vanne Jen) waas de ieërste Vorst. D’r waas eine optocht mèt prinsenwage, oppe kleutersjoeal waas d’r eine jeugdmiddig en natuurlijk waerdje ein rundje langs de cafés in Wèssem gemaaktj door de Prins en zien gevolg.
Leuk anekdote mbt de prinsewagen, bie Verheggen binnen in de loods opgeboewdj, mer wie der nao boete mos pasje hae neet door de poort.
De väöle positieve reacties hie op, gaaf de doorslaag óm es vereniging wiejer te gaon. D’r  mós eine  naam vuuer de vereniging gezóchtj waere.  En zoea-es ederein waal wètj is dit “De Golfbraekers” gewoeare. Waat neet ederein wètj is det Jo van Antje ꝉ (Jo Smeets) de naam haet bedachtj.
Vastelaovendj 1976 kreeg Prins Ad 1e de sluuetel van Börgemeister Douven uueverhandigdj en “De Golfbraekers” woeare neet mieër weg te dinke oet de Wèssemse Vastelaovendj.
18 februari 1977 waerdje de statuten bie de notaris vastgelag mèt dao-in opgenómme es oprichtingsdatum 10 december 1973.
De vereniging is vanaaf ‘t begin bezig gewaestj óm vuuer hieël Wèssem de Vastelaovendj te organisere en oet te drage nao boete. Door de jaore haer höbbe väöl bestuursleje, met inmiddels 2 vorsten, Raodsleje, Dames, commissieleje, Prinsen, vriewilligers, sponsore en donateurs mèt väöl plezeer geboewdj aan de vereniging en gemaaktj waat wae noe zeen.  Ein sterke en gezónj vereniging mèt ruum 300 leje woeavan d’r ein vieftigtal actief deil oet make van bestuur, raod en damesgarde, jeugdcommissie Braekerkes en Dansgarde en anger commissies mer aug de Boerebroelof en Bachus mooge wae hiebie neet vergaete. Echter mooge wae neet bie de pakken neer zitten en zullen oppe tied motte verjonge willen wae de wessemse vastelaovendj blieve viere en belaeve.
Eder jaor en jao, aug dit jaor kan jóngk en aod  genete van de Wèssemse Vastelaovendj. Dáó doon wae ‘t vuuer.
’t Guueftj dich es vereniging steeds weer de positieve energie óm door te gaon en woea mögelijk te gruuje.
De Golfbraekers zeen neet allein mögelijk gemaaktj door al die actieve leje mer vuueral ouch door de Wèssemse Vastelaovesvierder. Sónger  de steun en gedrageheid van de Wèssemse gemeinsjap waas dit allemaol noeait bereiktj.
Óze hertelijke dank hievuuer.

Eine sjoeane besjeije Vastelaovendj Same.

Namens De Golfbraekers

Vuuerzitter Roger